ഇന്ത്യയിലെ ഏറ്റവും ചെലവേറിയ നഗരങ്ങളിലൊന്നായ ബെംഗളൂരുവിൽ വെറും 500 രൂപ കൊണ്ട് ഒരു ദിവസം മുഴുവൻ ജീവിച്ചുതീർക്കാമെന്ന് തെളിയിച്ച് ഒരു യുവതിയുടെ വീഡിയോ സോഷ്യൽ മീഡിയയിൽ വൈറലാകുന്നു. പ്രിയങ്ക മൊണ്ടൽ എന്ന യുവതിയാണ് തന്റെ ബജറ്റ് പരീക്ഷണം ഇൻസ്റ്റാഗ്രാമിലൂടെ പങ്കുവെച്ചത്. ഭക്ഷണവും യാത്രാച്ചെലവും ഉൾപ്പെടെയുള്ള കാര്യങ്ങൾ കൃത്യമായി പ്ലാൻ ചെയ്താൽ പരിമിതമായ തുകയിലും നഗരജീവിതം സാധ്യമാണെന്ന് പ്രിയങ്ക വീഡിയോയിലൂടെ വ്യക്തമാക്കുന്നു.
രാവിലെ ഇഡ്ഡലി കഴിച്ചുകൊണ്ടാണ് പ്രിയങ്ക തന്റെ ദിവസം ആരംഭിച്ചത്. നഗരത്തിലെ ഉയർന്ന യാത്രാനിരക്ക് ഒഴിവാക്കാൻ ടാക്സികൾക്ക് പകരം മെട്രോ ട്രെയിനിനെ ആശ്രയിച്ചതാണ് പണം ലാഭിക്കാൻ യുവതിയെ സഹായിച്ചത്. ഉച്ചഭക്ഷണ സമയത്ത് ഹോട്ടലുകളിലെ മെനു കാർഡിലെ ഉയർന്ന വില കണ്ട് ആദ്യം ഒന്ന് അമ്പരന്നെങ്കിലും, 120 രൂപയ്ക്കുള്ളിൽ ഒതുങ്ങുന്ന ഒരു വിഭവം കണ്ടെത്താൻ തനിക്ക് സാധിച്ചുവെന്ന് പ്രിയങ്ക പറയുന്നു. ഇടവേളകളിൽ ചായയും ലഘുഭക്ഷണമായി വടാപാവും കഴിച്ചാണ് ബാക്കി സമയം ചെലവിട്ടത്.
ദിവസാവസാനം 500 രൂപയിൽ 200 രൂപ ബാക്കി ലഭിച്ചുവെന്നതാണ് ഈ പരീക്ഷണത്തിലെ കൗതുകകരമായ വശം. ഇത്രയും കുറഞ്ഞ തുകയിൽ ഒരു ദിവസം അതിജീവിക്കാൻ കഴിഞ്ഞതിൽ സന്തോഷം പ്രകടിപ്പിച്ചുകൊണ്ട് താരം നൃത്തം ചെയ്യുന്നതും വീഡിയോയിൽ കാണാം. ബെംഗളൂരു പോലുള്ള സ്ഥലങ്ങളിൽ മെട്രോ ട്രെയിനുകൾ സാധാരണക്കാർക്ക് എത്രത്തോളം ഉപകാരപ്രദമാണെന്ന് വീഡിയോ കണ്ട പലരും അഭിപ്രായപ്പെട്ടു. ചുരുങ്ങിയ ചെലവിൽ നഗരത്തിൽ സന്തോഷത്തോടെ കഴിയാമെന്ന് കാണിച്ചുതന്ന പ്രിയങ്കയുടെ വീഡിയോയ്ക്ക് വലിയ സ്വീകാര്യതയാണ് സോഷ്യൽ മീഡിയയിൽ ലഭിച്ചുകൊണ്ടിരിക്കുന്നത്.
